Rikthehet vëmendja mbi Kalanë e Tiranës (Gazeta Shekulli) |
Para
pak kohësh, Kalaja e Tiranës, me vendim të Këshillit të Ministrave, u
shpall Zonë Arkeologjike e Kategorisë "A". Statusi i ri ka për qëllim
mbrojtjen e monumenteve kulturore që ndodhen në këtë territor, ndalimin e
ndërtimeve dhe rritjen e vëmendjes për restaurime dhe gërmime të reja
në këtë zonë. Në hartën e re Arkeologjike (në formën dixhitale me
koordinata në sistemin GPS) shihet ndërtesa e Kinema Millenium 2,
Akademia e Shkencave, Parlamenti, Reparti dhe Instituti i Gjeografisë,
që janë brenda mureve rrethuese të Kalasë. Kurse, jashtë tyre, është
ndërtesa e Ish-Pallatit të Pionerit, Instituti Ushtarak dhe Shtëpia e
Ushtrisë, që janë të përfshira brenda vijës kufizuese të Zonës
Arkeologjike "A", gjithashtu të mbrojtura me ligj. "Është hera e parë që
Kalaja e Tiranës përfshihet në një zonë Arkeologjike të kësaj
kategorie", pohon përgjegjësia e Sektorit të Konservimit dhe
Arkeometrisë në ASHA (Agjencia e Shërbimit Arkeologjik), Albana Hakani.
Për Hartën e Kalasë dhe Rregulloren ka punuar një grup pune me 3
specialistë të Agjencisë së Shërbimit Arkeologjik, 1 specialist i
Institutit të Monumenteve dhe 1 nga Drejtoria Rajonale e Kulturës
Kombëtare. Po çfarë thuhet në rregulloren e miratuar për mbrojtjen e
kësaj zone arkeologjike? "Përveç mureve të kalasë, tashmë shpallet zonë e
mbrojtur edhe territori brenda dhe perreth kalasë. Në këtë mënyrë, nuk
ka më shteg për keq-interpretime dhe i jepet fund dëshirave abuzive për
të ndërtuar. Ndalohen të gjitha ndërhyrjet, duke përjashtuar ato të
restaurimit të monumenteve me leje të Këshillit Kombëtar të
Restaurimeve, si dhe ato të rrjetit inxhinierik me leje të Këshillit
Kombëtar të Arkeologjisë", shpjegon Hakani. Kurse, për objektet
jokulturore, që janë të ndërtuara brenda territorit rrethues të kalasë,
ende nuk është marrë ndonjë vendim. Më pas Hakani tregoi synimet që
Institucionet përkatëse kanë për zhvillimin e kësaj zone, ku përfshihen:
hapja e rrugës së zhvillimit të koncepteve shkencore dhe atyre të
arkeologjisë, që mund të aplikohen jo vetëm nga specialistë të fushës,
por edhe nga studentë të Universiteteve dhe një mirë prezantim i saj tek
turistët. Këtë praktikë, Agjencia e Shërbimit Arkeologjik e Ministrisë
së Kulturës synon ta ndjekë edhe për Administrimin e Zonave Arkeologjike
të Kategorisë "A" dhe "B" në qytetet: Durrës, Elbasan, Shkodër, Lezhë,
Vlorë.
Nessun commento:
Posta un commento